Dat hier is FIETE, de plattdüütsche Hund. Fiete is klook un kann goot lehren. He kann „Platz!“ un „sitt!“ un „hool stop! un all dat, wat en Hund hüüttodaags so mutt. Man he kann noch veel mehr. Wenn ik to ’n Bispeel to em segg: „Fiete, speel Klaveer!“ denn jumpt he op den Hocker, denn op de Tasten, eenmal hen, eenmal her un wedder rünner. He is wohrhaftig bannig klook! Dorum, un wiel dat he Kinner so geern hett, is he al oftins mit to mien Lesen in de Scholen mitkamen.

Denn is dat so: Wiel dat he Orders op Plattdüütsch versteiht, högen sik de Kinner bannig över em. Un gliek sünd se liesen un vull Bedacht. Un se wüllt partu ok Plattdüütsch lehren, so as de lütte Hund dat al kann. Denn fraagt se mi: „Kann Fiete ok op Plattdüütsch bellen un hulen?“ Un ik anser: „Dat meen ik man. Hör doch mal hen!“ Man denn bellt Fiete grad nich, wiel dat he sowieso nich so veel krakeelt.

Ut Fiete sien Speelhaas ward gau de Oosterhaas, un denn is dat nich wiet bit to de Geschicht vun dat föffte Oosterei. (Kiek bi „BÖKER“). Fiete liggt bi dat Lesen oordig op den Platz vör dat grote Bild, wat ik em egens för de Stünnen in de Scholen maalt heff.

Dor hett he dat komood, un he kann vun dor ut tokieken, wat de Deerns un Jungs so maakt. Männigmal steiht he liesen op un rüükt an de Schooltaschen. Denn harr he seker geern wat vun dat Schoolbroot ut de Taschen hatt. Man dat is kloor, dat geiht nich.

De Ünnerricht is noch nich lang in Gang, denn höört de lütte Hund al dorto. Wiel dat Fiete dat allens maakt, is he ok al in de Hannoversche Allgemeine wesen, dor is he bannig stolt op. Dat kannst du hier bekieken un nalesen.


HAZ, Dienstag, 18. November 2014

Wat ik noch seggen wull: Fiete is en Border Terrier.